काठमाडौं, ५ चैत । नेपालभाषाका जनकवि दुर्गालाल श्रेष्ठद्वारा लिखित बाल कविता संग्रह ‘चिनियाम्ह किसिचा (चिनीले बनाइएको हात्ती जो तिहारमा लक्ष्मीको पूजा गर्न प्रयाग गरिन्छ)’ को अंग्रेजी अनुवाद प्रकाशन भएको छ ।
आज काठमाडौंको जनबहालस्थित नासः दबूमा एक कार्यक्रम बीच उक्त कविता संग्रहको अंग्रेजी अनुवाद लोकार्पण गरिएको हो ।
‘फूलको आँखामा फूलै संसार’, ‘सय थरि गोडा एउटै चाल’ जस्ता लोकप्रिय गीतका लेखक जनकवि श्रेष्ठले आजभन्दा ६० वर्ष पहिले उक्त पुस्तक प्रकाशन गर्नुभएको थियो । ६० वर्ष अघिदेखि अहिलेसम्म पनि लोकप्रिय रहेको उक्त पुस्तकलाई कृतिश राजभण्डारीले अंग्रेजीमा उल्था गर्नुभएको हो ।
पुस्तक लोकार्पण कार्यक्रममा सोही पुस्तकमा समावेश रहेका बाल कविताहरू विभिन्न बालबालिकाहरूले वाचन गरी सुनाएका थिए । कार्यक्रममा लोककवि राजभाइ जकःमि र पत्रकार सुरेश किरणले जनकवि दुर्गालाल श्रेष्ठ एवं उहाँको कृतित्व बारे मन्तव्य राख्नुभएको थियो ।
किहोटेज कोभ प्रा.लि.ले उक्त पुस्तक प्रकाशन गरेको हो । ऐतिहासिक असन टोलमा आयोजित ‘इकोज इन दि भ्याली फेस्टिवल अफ म्युजिक’ कार्यक्रमकै एक अंशका रुपमा पुस्तक विमोचन कार्यक्रम पनि गरिएको थियो ।
