असोज १९, काठमाडौँ । कवि सुरज रानाको कविता संग्रह ‘जब कविता निस्कन्छ जुलुसमा’ सार्वजनिक भएको छ । बत्तीसपुतलीस्थित शिल्पी थिएटरमा एक कार्यक्रमका बीचका उपसभामुख इन्दिरा रानामगर, कवि श्रवण मुकारुङ, विन्दु शर्मा, गणेश खनिया र कवि रानाले संयुक्त रूपमा पुस्तकको लोकार्पण गरे ।
लोकार्पण कार्यक्रममा कविताहरुले आफूलाई असाध्यै छोएको कवि मुकारुङले बताए । उनले भने, ‘सुरजले कवितामार्फत् भन्ने कुराहरुमा व्यंग्य चेत असाध्यै शक्तिशाली छ । सँगै लिम्बुवानको कुरा पनि आएको छ, यो असाध्यै राम्रो कुरा हो ।’ उनले एउटा राम्रो कवि हुनलाई सबै मान्छेका कथा व्यथा लेख्नुपर्ने बताए । यसमा सुरज सफल भएको मुकारुङको भनाइ थियो । त्यस्तै शर्माले रानाको कवितामा मौकिलता भएको उल्लेख गरिन् । उनले भनिन्, ‘उहाँका कवितामा मिथक छ, संस्कृति छ, समाज छ । उहाँका कविताहरुले तर्कहरुको श्रंखला प्रस्तुत गरेर पाठकलाई घत पार्ने गर्छन् ।’
खनियाँले रानाका कवितामा पहिचानको मुद्दा शशक्त भएर आएको बताए । उनले भने, ‘यो कविता संग्रहमा लिम्बू किराँत मिथहरू छन् । दार्शनिक रूपबाट पनि कविताहरुको उठान भएको छ । लैंगिक चेत पनि छ ।’
एक दशकभन्दा लामो समयदेखि लेखनमा सक्रिय रहेका रानाको यो पहिलो कविता संग्रह हो । यस संग्रहमा ‘ओ बाहुनी’, ‘प्रहरी चौकीमा सोल्टा’, ‘लेस्बियन छाया’, ‘म ब्रह्माण्ड’, ‘जब कविता निस्कन्छ जुलुसमा’ गरी पाँच खण्डमा ४४ कविताहरुलाई विभाजन गरिएको छ । यो कवितासंग्रह सांग्रिला पब्लिकेसनले बजारमा ल्याएको हो ।
